3 இந்தியர்களுக்கு பிரிட்டன் அரசியின் இளம் தலைவர்கள் விருது

இங்கிலாந்தில், பிரிட்டன் அரசியின் இளம் தலைவர்கள் விருது 3 இந்தியர்களுக்கு வழங்கப்பட்டது.

காமன்வெல்த் நாடுகளில், தாங்கள் சார்ந்த சமூகத்துக்குத் தொண்டாற்றிய இளம் சாதனையாளர்களுக்கு பிரிட்டன் அரசி சார்பில் கடந்த ஆண்டு முதல் விருதுகள் வழங்கப்பட்டு வருகின்றன.

இந்த ஆண்டுக்கான விருது, பக்கிங்ஹம் அரண்மனையில் நடைபெற்ற நிகழ்ச்சியில் வழங்கப்பட்டது. இதில் இந்தியாவைச் சேர்ந்த அஸ்வினி அங்காடி, தேவிகா மாலிக், அக்ஷய் ஜதாவ் உட்பட 60 பேருக்கு வழங்கப்பட்டது.

பெங்களூரில் கண் பார்வையற்றோர் பயன் பெறும் வகையில் அதிக அளவில் பிரெய்லி, ஆடியோ புத்தகங்களை வெளியிடச் செய்தமைக்காக அஸ்வினி அங்காடிக்கும், மகாராஷ்டிராவின் கிராமப் பகுதியில் கல்விப் பணி ஆற்றியதற்காக அக்ஷய் ஜதாவுக்கும், மாற்றுத் திறனாளிகளுக்கு சேவைகள் அளித்தமைக்காக தேவிகாவுக்கும் இந்த விருதுகள் வழங்கப்பட்டன.

விருதுக்கு தேர்ந்தெடுக்கும் மாணவர்கள் ஆன் லைன் மூலமாக படிக்கும் வாய்ப்பு கிடைப்பதுடன் இங்கிலாந்து ராணியையும், பிரதமர் டேவிட் கேமரூனையும் சந்திக்கும் வாய்ப்பையும் பெறுகின்றனர்